ទ្រូម៉ាន់នី ដែលជាក្រុមហ៊ុនបច្ចេកវិទ្យាហិរញ្ញវត្ថុដ៏ល្បីឈ្មោះមួយនៅកម្ពុជា បានឱ្យដឹងថា បច្ចេកវិទ្យាហិរញ្ញវត្ថុ ប្រជាពលរដ្ឋមានចំណេះដឹងផ្នែកបច្ចេកវិទ្យា និងការតភ្ជាប់បណ្ដាញអ៊ីនធឺណិតនៅទូទាំងប្រទេស គឺជាកម្លាំងចលករសំខាន់ៗ សម្រាប់កំណើនអក្ខរកម្មផ្នែកហិរញ្ញវត្ថុ និងហិរញ្ញវត្ថុឌីជីថលនៅទូទាំងប្រទេស។
ដោយលើកឡើងគំនិតផ្ដួចផ្ដើមសំខាន់ៗមួយចំនួន ដូចជា ប្រព័ន្ធប្រតិបត្ដិការបាគង (Bakong System) និងកម្មវិធី Let’s Talk Money ដែលត្រូវបានបង្កើតឡើងដើម្បីលើកកម្ពស់ការពិភាក្សាក្នុងចំណោមប្រជាពលរដ្ឋខ្មែរទូទាំងប្រទេសអំពីបញ្ហាហិរញ្ញវត្ថុ លោកស្រី ឃួន ហ្រ្វង់ដារា អគ្គនាយិកាគ្រប់គ្រងផ្នែកយុទ្ធសាស្រ្តរបស់ក្រុមហ៊ុន ទ្រូម៉ាន់នី (ខេមបូឌា) បានថ្លែងថា លោកស្រីមានជំនឿចិត្ដថា វិស័យបច្ចេកវិទ្យាហិរញ្ញវត្ថុ និងវិស័យហិរញ្ញវត្ថុ នឹងទទួលបានជោគជ័យក្នុងការសម្រេចបានការលើកកម្ពស់ការអប់រំផ្នែកហិរញ្ញវត្ថុ និងការបង្កើនអក្ខរកម្មហិរញ្ញវត្ថុឌីជីថល។
ប្រព័ន្ធបាគងគឺជាកម្មវិធីដែលត្រូវបានរួមបញ្ចូលគ្នាតែមួយគត់នៅកម្ពុជា ដែលអាចឱ្យអតិថិជនធ្វើប្រតិបត្ដិការផ្សេងៗដូចជា កាបូបប្រាក់អេឡិចត្រូនិក (E-wallet) និងការទូទាត់តាមទូរស័ព្ទ ធនាគារ និងកម្មវិធីហិរញ្ញវត្ថុផ្សេងទៀតដែលស្ថិតនៅក្នុងកម្មវិធីតែមួយ។
យុទ្ធការ Let’s Talk Money ត្រូវបានបង្កើតឡើងដោយមានកិច្ចសហការជាមួយធនាគារជាតិនៃកម្ពុជា (NBC) និងអង្គការ Good Return Australia។
លោកស្រី ឃួន ហ្រ្វង់ដារា បានមានប្រសាសន៍ថា៖ «ក្រោមការណែនាំរបស់ធនាគារជាតិនៃកម្ពុជា ប្រទេសកម្ពុជាកំពុងឈានទៅសម្រេចបានគោលបំណងរបស់ខ្លួនក្នុងការសម្រេចបានបរិយាបន្នហិរញ្ញវត្ថុ និងអក្ខរកម្មហិរញ្ញវត្ថុឌីជីថលសម្រាប់ទាំងអស់គ្នា។ NBC មិនត្រឹមតែផ្ដល់ការណែនាំសម្រាប់វិស័យនេះប៉ុណ្ណោះទេ ប៉ុន្ដែថែមទាំងធានាថា ស្ថាប័នហិរញ្ញវត្ថុទាំងអស់កំពុងធ្វើការរួមគ្នាឆ្ពោះទៅសម្រេចគោលដៅតែមួយផងដែរ»។
យោងតាមក្រុមហ៊ុន ទ្រូម៉ាន់នី បានឱ្យដឹងថា ពលរដ្ឋខ្មែរវ័យក្មេងគឺជាកម្លាំងចលករយ៉ាងសំខាន់ក្នុងការសម្រេចគោលបំណងបរិយាបន្នហិរញ្ញវត្ថុ និងអក្ខរកម្មហិរញ្ញវត្ថុឌីជីថល។ កត្តានេះគួបផ្សំជាមួយនឹងពលរដ្ឋកម្ពុជារាប់លាននាក់កំពុងប្រើប្រាស់ស្មាតហ្វូន ជាអ្នកមានចំណេះដឹងផ្នែកបច្ចេកវិទ្យា និងមានការតភ្ជាប់បណ្ដាញអ៊ីនធឺណិត នឹងជួយពន្លឿនព្រះរាជាណាចក្រមួយនេះឱ្យស្ថិតលើផ្លូវរបស់ខ្លួនឆ្ពោះទៅរកការផ្តល់អក្ខរកម្មហិរញ្ញវត្ថុឌីជីថលដល់ប្រជាពលរដ្ឋ ជាពិសេសអ្នកដែលមិនទាន់ទទួលបានសេវាធនាគារ។ យ៉ាងណាមិញ បញ្ហាប្រឈមចម្បងមួយគឺការបោះជំហានឆ្ពោះទៅកាន់អ្នកមិនទាន់បានមាន ការយល់ដឹងផ្នែកហិរញ្ញវត្ថុឌីជីថល។
លោកស្រី ឃួន ហ្រ្វង់ដារា បានបន្ថែមថា៖ «ក្រុមហ៊ុន ទ្រូម៉ាន់នី អាចជួយបានតាមរយៈការផ្ដល់លទ្ធភាពដល់អ្នកដែលអាចមិនទាន់ប្រើប្រាស់កម្មវិធី TrueMoney Wallet ទទួលបានការយល់ដឹងកាន់តែច្បាស់ពីអក្ខរកម្មហិរញ្ញវត្ថុឌីជីថល ។ ហើយទ្រូម៉ាន់នី ក៏មានបណ្ដាញភ្នាក់ងារជាង ១ម៉ឺនភ្នាក់ងារនៅទូទាំងប្រទេស ដែលពួកគេកំពុងផ្ដល់សេវាកម្ម និងការអប់រំដល់មនុស្សរាប់លាននាក់រួចហើយផងដែរ»។
ក្រុមហ៊ុន ទ្រូម៉ាន់នី បានបង្ហាញឆន្ទៈរបស់ខ្លួនក្នុងការធ្វើការងារជាមួយធនាគារជាតិនៃកម្ពុជា និងស្ថាប័នដទៃទៀត ដើម្បីសម្រេចបានបរិយាបន្នហិរញ្ញវត្ថុ និងលើកកម្ពស់អក្ខរកម្មហិរញ្ញវត្ថុ តាមរយៈកិច្ចសហប្រតិបត្តិការ និងអនុស្សារណៈនៃការយោគយល់ជាមួយស្ថាប័នហិរញ្ញវត្ថុល្បីៗមួយចំនួនក្នុងប្រទេស។
ចាប់តាំងពីចាប់ផ្តើមប្រតិបត្តិការក្នុងប្រទេសកម្ពុជាក្នុងឆ្នាំ២០១៦ មក ក្រុមហ៊ុន ទ្រូម៉ាន់នី បានបង្កើតបណ្តាញភ្នាក់ងារបច្ចេកវិទ្យាហិរញ្ញវត្ថុធំបំផុតក្នុងប្រទេសនេះ ដោយក្រុមហ៊ុនមានបណ្តាញភ្នាក់ងារ ចំនួនជាង ១ម៉ឺនភ្នាក់ងារ ដែលរង់ចាំផ្ដល់សេវាទាក់ទងនឹងហិរញ្ញវត្ថុនៅគ្រប់ទីកន្លែងទាំងអស់នៅកម្ពុជាដែលមិនទាន់មានសេវាធនាគារ។
នាពេលបច្ចុប្បន្ន ក្រុមហ៊ុន ទ្រូម៉ាន់នី កំពុងផ្តល់សេវាទូទាត់ប្រាក់ជាច្រើនប្រភេទដូចជា សេវាផ្ទេរប្រាក់ក្នុងស្រុក ទូទាត់វិក្កយបត្រ បញ្ចូលលុយទូរស័ព្ទ បង់ប្រាក់កម្ចី សេវាទទួលប្រាក់បញ្ញើពីក្រៅប្រទេស និងបើកប្រាក់ខែ តាមទូរស័ព្ទស្មាតហ៊្វូន និងតាមភ្នាក់ងារ។ ទ្រូម៉ាន់នី ស្ថិតក្រោមការគ្រប់គ្រងរបស់ ក្រុមហ៊ុន Ascend Money ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Charoen Pokphand Group (CP) និងជាដៃគូសហការរបស់ក្រុមហ៊ុនបច្ចេកវិទ្យាហិរញ្ញវត្ថុ Ant Financial របស់ក្រុមហ៊ុនអាលីបាបា៕